विराटनगरमा गाँजासहित समातिएको गाडीबाट अस्पतालको पहिचान मेट्न खोजेको अभियोगमा महेन्द्र मोरङ क्याम्पसका स्ववियु सभापति रोहित यादव पक्राउ परेका छन्।
जिल्ला प्रहरी कार्यालय मोरङले विराटनगर–१४ का २८ वर्षीय यादवलाई नियन्त्रणमा लिई म्याद थप गरेर अनुसन्धान अघि बढाएको छ।
प्रहरीका अनुसार को १ च ६६२० नम्बरको भ्यानबाट ५० किलो २९० ग्राम गाँजा बरामद भएपछि उक्त गाडीलाई इलाका प्रहरी कार्यालय रानीको नियन्त्रणमा राखिएको थियो।
सोही क्रममा प्रहरी परिसरभित्रै छिरेर गाडीमा टाँसिएको दिव्य ज्योति अस्पताल प्रालिको स्टिकर हटाइएको थियो।
सशस्त्र प्रहरीले भ्यान नियन्त्रणमा लिँदा गाडीमा अस्पतालको नाम स्पष्ट देखिए पनि पछि प्रहरी परिसरमै रहेको गाडीको तस्बिर सार्वजनिक हुँदा स्टिकर गायब भएको थियो।
प्रहरी नियन्त्रणमै रहेको सवारी साधनबाट प्रमाण हटाइएपछि प्रहरीको भूमिकामाथि प्रश्न उठेको थियो। सोही विषयलाई लिएर इप्रका रानीका प्रमुख प्रहरी निरीक्षक प्रविण घिमिरेले स्पष्टीकरण समेत बुझाइसकेका छन्।
प्रहरीका अनुसार गाँजा ओसारपसारमा प्रयोग भएको गाडीको वास्तविक धनी, अस्पतालको लोगो दुरूपयोग र नियन्त्रणमा रहेको गाडीको स्टिकर उखेल्ने कार्यमा यादवको प्रत्यक्ष संलग्नता देखिएकाले उनलाई पक्राउ गरिएको हो।
दिव्य ज्योति आँखा अस्पतालका अध्यक्ष देवा यादवले भने उक्त भ्यान आफ्नो अस्पतालको नभएको दाबी गर्दै आएका छन्।
-1746009348.jpg)
